Нуриман сәнғәт мәктәбенә 55 йыл.

Мәҙәниәт хеҙмәткәрҙәре көнө алдынан район үҙәгендә Нуриман  балалар сәнғәт мәктәбенең ойошторолоуына 55 йыл тулыу айҡанлы тантаналы сара үтте.

         Балалар сәнғәт мәктәбенә нигеҙ 1967 йылда һалынған. Башта ул Нуриман музыка мәктәбе тип йөрөтөлә, ә 2007 йылдан  Нуриман  сәнғәт мәктәбе тип үҙгәртелә.

         55 йыл арауығында был белем усағы бик күптәрҙә сәнғәткә һөйөү тәрбиәләгән, уҡыусы балаларҙың ижади һәләттәрен  үҫтереүҙә булышлыҡ иткән, профессия һайлауҙа дөрөҫ йүнәлеш биргән. Бөтә Рәсәй, республика кимәлендә үткәрелгән бәйгеләрҙә, фестивалдәрҙә еңеү яулап, ҙур уңыштарға ирешкән тәрбиәләнәүселәре менән дә дан тота сәнғәт мәктәбе. Үҙ юлын мәҙәниәт өлкәһе менән бәйләгән уҡыусылары ла бихисап.