Барыһы ла туған телдә

Бөгөн Благовещен районының муниципаль бюджет мәҙәниәт учреждениеһы Благовещен район биләмә-ара үҙәкләштерелгән китапханала Башҡорт теле көнөнә арналған матур сара үтте. Китапханаға йыйылып килгән балалар, өлкәндәр, район - ҡаланың башҡорт теле һәм әҙәбиәте уҡытыусылары яғымлы ла, бай ҙа булған башҡорт телендә кинәнеп аралашты. Теләгәндәр әсә телендә телмәр тотто, ҡурайсылар моңло көй уйнаһа, ә телгә маһирҙар яттан шиғыр уҡыны һәм йырҙар йырланы. Тырыш хеҙмәте менән хөрмәт яулаған башҡорт теле уҡытыусыларына рәхмәт хаттары тапшырылды.
- Ошондай әһәмиәтле көндә лайыҡлы маҡтау һүҙҙәре ишетеү кәйефте күтәрҙе һәм алда ла матур эштәргә әйҙәне, - тип һөйләне бүләкләнгән уҡытыусылар.
Ә уларҙың араһынан 5-се мәктәптең башҡорт теле һәм әҙәбиәте уҡытыусыһы Зифа Байморатова "Башҡорт теле кабинеты" республика конкурсы еңеүсеһе лә булды.