Һөнәре менән бәхетле

11-се класты тамамлағандан һуң ул 1992 йылда Өфө медицина училищеһына уҡырға инә. Шәфҡәт туташы һөнәрен Ралина Мәрүәр ҡыҙы осраҡлы ғына һайламай, ул – табиптар династияһын дауам итеүсе. Уның әсәһе 40 йылдан ашыу фельдшер булып эшләй.
– Бала саҡтан уҡ әсәйемдең эшен күҙәтергә яраттым, – тип һөйләне ул. – Ул минең өсөн бөтә яҡлап өлгө булды, мин уға оҡшарға теләнем. Шуға күрә тормошомдо медицина менән бәйләргә ҡарар иттем, һәм быға мин бер ҡасан да үкенмәнем.
Медицина училищеһын тамамлағандан һуң Ралина Мәрүәр ҡыҙы хеҙмәт юлын тыуған яғында – Әлшәй районының Никифар дауаханаһында башлай. Үҙенең ҡатын-ҡыҙ һәм әсәлек бәхетен дә ул тыуған ерендә таба. Ире менән ҡыҙ һәм ул үҫтерәләр. Ҡыҙы атаһы эҙенән китә – энергетика өлкәһен, ә улы олатаһының һөнәрен һайлаған, педагогия университетына уҡырға ингән.
Медицина хеҙмәткәрҙәренең эше еңел түгел, көн һайын уларҙың ҡулдары аша күп һанлы пациенттар үтә. Ралина Шәйхетдинова һөнәренең кәрәклеген һәм мөһимлеген аңлай, бөтәһе менән дә уртаҡ тел табып эшләй.
Шәфҡәт туташы бурыстарына санитар-эпидемиологик нормаларҙы үтәү, пациенттарҙы дауалауға әҙерләү, манипуляциялар үтәү, табипҡа ярҙам итеү (пломбалау материалы, инструменттар әҙерләү һ. б.), препараттар иҫәбен алыу, уларҙың яраҡлылыҡ ваҡытына тап килеүен тикшереү, шулай уҡ документтар тултырыу һәм башҡалар инә.
– Мин һөнәремде яратам, – ти ул. – Кешеләргә ярҙам итеү һәм эшемдең һөҙөмтәһен күреү – һөнәри эшмәкәрлегемдең иң мөһим критерийы. Хеҙмәттәштәремә бик рәхмәтлемен, улар менән бер-беребеҙгә һәм пациенттарға ҡарата йылы мөнәсәбәт беҙҙең бергә эшләү һөҙөмтәһенә бәйле икәнен барыбыҙ ҙа яҡшы аңлай. Медицина юлын һайларға теләгән йәштәргә ауырлыҡтарҙан ҡурҡмаҫҡа кәңәш итәм.
Ралина Мәрүәр ҡыҙы – бәхетле ҡатын, әсәй һәм өләсәй. Эштән буш ваҡытын ул ғаиләһенә бағышлай, йорт, баҡса эштәре менән шөғөлләнә, шулай уҡ төрлө ризыҡтар әҙерләргә һәм яҡындарын һыйларға ярата.
– Көн һайын яратҡан эшемә ашығып киләм. Унда мине пациенттарым көтә, – ти ул. – Мин уларға кәрәк, ә кешеләргә кәрәк булыу – минең өсөн оло бәхет.
Әле яңыраҡ Ралина Шәйхетдинова үҙенең алтын юбилейын билдәләне. Ралина Мәрүәр ҡыҙын ошо матур дата менән ҡотлайбыҙ, уға ныҡлы һаулыҡ, еңел булмаған хеҙмәтендә уңыштар теләйбеҙ.