Йәйғор
+24 °С
Болотло
Бөтә яңылыҡтар
29 Апрель , 15:14

Талпандан нисек һаҡланырға?

Башҡортостанда талпандар уянды. Уларҙың кеше һәм хайуандар өсөн хәүефле инфекция таратыусы булыуы ихтимал. «Роспотребнадзор»ҙың Башҡортостан Республикаһы буйынса идаралығы белгестәре үҙеңде нисек һаҡларға кәрәклекте иҫкә төшөрә.

Талпандар нисек һөжүм итә?

Улар үҙенең ҡорбанын үләндә йәки ҡыуаҡлыҡта көтә. Кешегә һикереп, талпан тәндең асыҡ өлөшөн эҙләй. Уның яратҡан урындары: муйын, баш, ҡултыҡ аҫты, янбаш, балтыр.

Тешләгәндә талпан ауыртыуҙы баҫа торған шыйыҡса ебәрә, шуға күрә һеҙ бер нәмә лә һиҙмәйәсәкһегеҙ.

Ата талпан, ҡан эскәндән һуң, үҙе килеп төшә, ә инә талпан тирелә бер нисә тәүлек ултыра ала, ҙурая һәм йомортҡа һала.

 Һаҡлыҡ саралары:
— Бейек булып үҫкән үләндә, бигерәк тә асыҡ кейемдә йөрөмәгеҙ.
— Кейемгә һәм тирегә талпанға ҡаршы репелленттар һиптерегеҙ.
— Тәбиғәт ҡосағында баш кейеме, оҙон ҡуныслы ойоҡбаш һәм талпанды туҡымала күреү еңелерәк булһын өсөн асыҡ төҫтәге ябыҡ кейем кейегеҙ.
— Урамда йөрөгәндән һуң бинаға инер алдынан бөтә тәнегеҙҙе һәм әйберҙәрегеҙҙе иғтибар менән ҡарап сығығыҙ. Әгәр һеҙҙең менән йорт хайуаны булһа, уларҙы ла ҡарап сығығыҙ.
— Ялан сәскәләрен йыймағыҙ һәм уларҙы өйгә алып ҡайтмағыҙ.

Талпан тешләгәнен нисек аңларға?

1. Тешләгән урын ҡыҙара - яраның эргә-тирәһе яйлап сағыу ҡыҙыл төҫкә инә, овал йә түңәрәк тап барлыҡҡа килә.

2. Өс сәғәттән һуң ҡалтыратыуы, йоҡо баҫыуы, хәлһеҙлек, яҡтылыҡтан ҡурҡыу барлыҡҡа килеүе, быуындарҙың ауыртыуы, тән температураһының күтәрелеүе ихтимал.

3. Ҡайһы берҙә тән ҡысырға, ҡан баҫымы түбәнәйергә, йөрәк тибеше көсәйергә, лимфа төйөндәре ҙурайырға мөмкин.

❗ Талпанды мөмкин тиклем тиҙерәк сығарырға кәрәк! Паразит зарарлы булһа, тәндә оҙағыраҡ булған һайын ауырыу йоҡтороу ихтималлығы ла арта.

🚑 Кисекмәҫтән дауаханаға мөрәжәғәт итегеҙ. Әгәр ундай мөмкинлек булмаһа, талпанды үҙегеҙгә алырға кәрәк:

1. Уны пинцет йәки таҙа марля менән уратып алып тартып сығарығыҙ. Бөжәктең мөмкин тиклем башынан тоторға тырышығыҙ.

2. Талпанды саҡ ҡына күтәреп бер яҡҡа бер нисә тапҡыр бороғоҙ, шунан һуң өҫкә тартығыҙ. Алып ташлағанда ҡыҫмағыҙ — ауырыу тыуҙырыусы микробтарҙың яраға эләгеүе бар.

3. Әгәр талпанды сығарғандан һуң тәндә ҡара нөктә ҡалһа, тимәк, бөжәктең мороно ҡалған. Уны дезинфекцияланған энә менән алып ташлағыҙ.

4. Тешләнгән урынды йод йәки спирт менән эшкәртегеҙ.

❗ Талпанды яланғас ҡул менән алып ташлау йәки ҡыҫып сығарыу ҡәтғи тыйыла.

Бөжәкте бер аҙ дымлы мамыҡ киҫәге менән герметик һауытҡа һалығыҙ һәм тикшереү өсөн лабораторияға тапшырығыҙ. Лаборатория адрестары - ошонда: vk.cc/cwqK5h.

Ҡағиҙәләрҙе балаларығыҙға аңлатығыҙ. Балалар шунда уҡ өлкәндәргә ярҙам һорап мөрәжәғәт итергә тейеш.Ошо яҙманы яҡындарығыҙ менән бүлешегеҙ!

#Аңлатабыҙ_Башҡортостан

Читайте нас: