Саннинское ауылынан ирекмән Ксения Фәттәхова хәрбиҙәрҙән рәхмәт хаты алды

Ксения Сергеевнаға рәхмәт һүҙҙәрен полк командиры, полковник Куковеров шәхсән еткерҙе. Хатта полк һәм Балтик флотының 1-се мотоуҡсылар батальоны командованиеһы Ксенияға күрһәткән гуманитар ярҙамы өсөн ихлас рәхмәт белдерә. «Һеҙҙең фиҙаҡәр ярҙамығыҙ һәр яугир өсөн бик мөһим һәм бер ҡасан да онотолмаясаҡ», — тип һыҙыҡ өҫтөнә алына рәсми документта.

Ксения Фәттәхова өсөн был ярҙам — ябай ғына ирекмәнлек эше түгел. Ул — махсус хәрби операцияла ҡатнашыусының ҡатыны. Уның ире, ил мәнфәғәттәрен яҡлап, хәҙер алғы һыҙыҡта. Әммә яҙмыш уны һынауға дусар итә: ире менән бәйләнеш күптән өҙөлгән.

Был ауыр көндәрҙә, һәр хәбәр баһалап бөткөһөҙ булып киткән мәлдә, Ксения үҙендә ҡулдарын төшөрмәҫкә һәм ҡайғыға бирешмәҫкә көс таба. Ул үҙен генә уйлап ултырмай, бөтә көсөн «таҫма артында» — фронтта булған егеттәргә ярҙам итеүгә йүнәлтә.

— Иремдән күптән инде бер ниндәй ҙә хәбәр юҡ, — тип уртаҡлаша Ксения Сергеевна. — Әммә мин мөғжизәгә ышанам, уның иҫән булыуына һәм мотлаҡ өйгә ҡайтасағына ышанам. Әлегә, өмөтөмдө юғалтмаҫ өсөн һәм файҙалы булыр өсөн, минең төп бурысым — хәрбиҙәребеҙгә ярҙам итеү.

Ксенияның был фиҙаҡәрлеге — күптәргә өлгө. Ул үҙенең шәхси ҡайғыһын дөйөм еңеүгә ынтылыш менән берләштерә алды. Уның кеүек ихлас һәм ярҙамсыл кешеләр булғанда, беҙҙең яугирҙәрҙең рухы нығый, ә еңеү көнө тағы ла яҡыная.