Благовещен мәктәбендә – энергетика киләсәге: яңы профилле класс асылды

Благовещен ҡалаһының 5-се мәктәбендә иҫтәлекле ваҡиға – энергетика йүнәлешендәге профилле класс ишектәрен асты. Был ябай ғына уҡыу курсы түгел, ә уҡыусыларға энергетика өлкәһендәге потенциалдарын асырға, һөнәри йүнәлеш алырға ярҙам итәсәк заманса белем биреү майҙансығы.

Асыу тантанаһында район хакимиәте башлығының төҙөлөш һәм торлаҡ-коммуналь хужалыҡ буйынса урынбаҫары Антон Медведев яңы проекттың мөһимлеген һыҙыҡ өҫтөнә алды:
— Бөгөн һеҙ энергетика донъяһына ишек асасаҡ ҙур юлдың бер өлөшө булып тораһығыҙ. Уҡытыусылар һәм өлкән остаздар үҙҙәренең белемен һәм тәжрибәһен тапшырырға әҙер, шулай итеп, һәр берегеҙ һайлаған һөнәрегеҙҙә үҙен тормошҡа ашыра алыр ине, — тип билдәләне ул уҡыусыларға мөрәжәғәт итеп.

Энергетика класы «Башҡортостан генерациялау компанияһы» ярҙамында булдырылған. Компания кабинетты брендлау өсөн кәрәкле финанс ярҙамы күрһәтеп кенә ҡалмай, уҡыу процесы өсөн заманса ҡорамалдар ҙа һатып алған.

Өфө эргәһендәге йылылыҡ электр үҙәгенең баш инженеры Айрат Мостаев билдәләүенсә, уҡыусыларҙың уңышлы белем алыуы өсөн бөтә шарттар ҙа булдырылған. Курс программаһына физика һәм математиканы тәрән өйрәнеү, шулай уҡ энергетика һөнәренең нескәлектәре менән танышыу инә.

— Беҙ уҡыусыларға теоретик белем генә түгел, артабанғы карьераларында ярҙам итерлек практик күнекмәләр ҙә бирелеүен теләйбеҙ. Энергетика — юғары квалификация һәм яуаплылыҡ талап иткән тармаҡ. Профилле класс талантлы балалар өсөн бик яҡшы старт майҙансығы булырына ышанабыҙ, — тине Айрат Мостаев.

Тиҙҙән уҡыусыларҙы электр станцияларына ҡыҙыҡлы экскурсиялар, тәжрибәле энергетиктар һәм компанияның йәштәр активы менән осрашыуҙар, тематик дәрестәр көтә. Был саралар балаларға һөнәр үҙенсәлектәрен яҡшыраҡ аңларға һәм киләсәктә үҙ юлдарын дөрөҫ һайларға ярҙам итәсәк.

Благовещендың 5-се мәктәбендә асылған был класс — төбәктәге сәнәғәт предприятиелары менән мәғариф учреждениелары араһындағы уңышлы хеҙмәттәшлектең сираттағы күрһәткесе. Ул йәш быуын өсөн яңы мөмкинлектәр ишеген асып ҡына ҡалмай, ә илебеҙҙең стратегик мөһим тармағы өсөн юғары квалификациялы кадрҙар резервын әҙерләүгә лә ҙур өлөш индерә.

Мәктәп уҡыусылары өсөн был проект — үҙҙәренең һәләттәрен һынап ҡарау, фәнни ҡыҙыҡһыныуҙарын тормошҡа ашырыу һәм киләсәктә абруйлы һөнәр эйәһе булыу өсөн ысын мәғәнәһендә «алтын билет». Энергетика өлкәһендәге белемле, заманса технологияларҙы үҙләштергән йәш белгестәр — илебеҙҙең иҡтисади ҡеүәтен арттырыуҙың төп нигеҙе.

Алдағы уҡыу йылында уҡыусыларҙы ҡыҙыҡлы асыштар, яңы белемдәр һәм профессиональ үҫеш юлындағы тәүге етди аҙымдар көтә. Был башланғыс Благовещен ҡалаһының мәғариф системаһында ғына түгел, ә бөтә республика күләмендә лә йәштәрҙе һөнәри йүнәлешкә йәлеп итеүҙең яҡшы өлгөһө булып тора.