Иглин спортсыһы – донъя кубоғында

Иглин районының Таутөмән ауылында йәшәүсе танылған спортсы Инна Айбушева Германияның Лейпциг ҡалаһында уҙған ҡул һуғышы буйынса донъя кубогында ҡатнашты. Ярыштарҙа Литва, Эстония, Польша, Ҡаҙағстан, Үзбәкстан, Италия һәм башҡа илдәрҙән 200-ҙән ашыу спортсы көс һынашты.

Инна 75 килограмға тиклемге ауырлыҡ категорияһында сығыш яһаны. Ул Литва һәм Үзбәкстан көрәшселәрен еңеп, икенсе урынға лайыҡ булды.

Инна Айбушева Таутөмән ауылында үҙе ойошторған “Таин” спорт клубында тренер булып эшләй. Уның тәрбиәләнеүселәре төрлө дәрәжәләге ярыштарҙа һәр ваҡыт яҡшы һөҙөмтәләр күрһәтә.