Күмәкләшеп саңғыға, волейболға

Благовещен ҡалаһындағы М.Киняшов исемендәге 6 - сы һанлы мәктәпкә күмәк спорт төрө - волейболды үҙ иткәндәр ярыштарға йыйылды.

2005-2007 йылда тыуған ҡыҙҙар һәм егеттәр XXII Спартакиадала ҡала - райондың мәктәп уҡыусылары иҫәбенә үткән ярыштарҙа әүҙем ҡатнашты. Башҡа мәктәп командалары араһында 6 - сы мәктәптең ҡыҙҙары беренселәр рәтенә инһә, ә егеттәр командаһы икенсе урынға сыҡты.

Райондың иң шәп саңғысылары тип ҡаланың 5 - се, 6- сы, 4- се мәктәп уҡыусылары танылды. Улар бер саҡрым дистанцияны етеҙ үтте. Алдынғылар район данын республика кимәлендәге ярыштарҙа яҡлаясаҡ.

Сәләмәт тормош яҡлы уҡыусылар тәрбиәләгән уҡытыусыларҙың, спорт яратҡан йәштәрҙең уртаҡ эштәре ыңғай һөҙөмтә бирә.