Сираттағы эшҡыуарлыҡ сәғәте

​Нуриман районы хакимиәтендә үткәрелгән “Эшҡыуарлыҡ сәғәте” муниципалитет территорияһында урынлашҡан мәктәптәрҙе, балалар баҡсаларын, дәүләт учреждениеларын һаҡлау буйынса эшмәкәрлекте үҫтереүгә арналды

​“Абсолют - 02” предприятиеһы тәҡдим иткән хәүефһеҙлекте көсәйтеү саралары хаҡында эшлекле фекер алышыу булды.

​Хакимиәт башлығы Азамат Ризуан улы Носратуллин билдәләүенсә, мәктәптәрҙе, балалар баҡсаларын һаҡлауҙы ойоштороу 44 - ФЗ законына ярашлы алып барыла, ләкин был системаның йомшаҡ яҡтары ла бар. Етешһеҙлектәрҙе бөтөрөү буйынса ҡарар ҡабул ителде.

​“Эшҡыуарлыҡ сәғәте”ндә шулай уҡ Яңы Күл ауыл биләмәһендә һарыҡсылыҡты үҫтереү юлдары ҡаралды. Үҙ эшен башлаусы фермер “Агростартап” дәүләт программаһында ҡатнашып, һарыҡ үрсетеү менән шөғөлләнергә теләге барлығын белдерҙе. Уға бизнес - план төҙөүҙә, кәрәкле документтар папкаһын әҙерләүҙә ярҙам күрһәтеләсәк. “Агростартап” дәүләт программаһы буйыса крәҫтиән - фермер хужалыҡтары 3 миллион һумға тиклем дәүләт ярҙамы алыу мөмкинселегенә эйә. Был аҡсаны ферма төҙөүгә, ауыл хужалығы техникаһы, малдар һатып алыуға тотонорға мөмкин.