Ауылға машина кәрәк

Оло-Тәләк ауыл биләмәһенең Кировский ауылы халҡы урындағы башланғыстарға булышлыҡ итеү программаһында ҡатнашырға булды.

Ғөмүм йыйылышта кировтар беренсе сиратта ауылға үҙ бушатҡыс йөк машинаһы кәрәк, тигән ҡараға килде. Уларҙың фекеренсә, был машина ярҙамында насар хәлдә булған юлдарға ҡом-таш ташып йәйәргә мөмкинлек буласаҡ. Бынан тыш, техника территорияларҙы таҙартыу буйынса өмәләргә, экологик субботниктарға ла йәлеп ителәсәк. Ә ҡышҡы осорҙа машинаны юлдарҙы ҡарҙан таҙартырлыҡ итеп көйләп була.

Программала кировтар беренсе тапҡыр ғына ҡатнашмай, шуға күрә улар был проекттың да еңеүенә ышана.