«СИБУР - БАЛАЛАРҒА» традицион мини-баскетбол фестивале - Благовещенда

12-14 йәшлек 120-гә яҡын йәш спортсы ошо көндәрҙә Благовещенда үткән «СИБУР - БАЛАЛАРҒА» традицион мини-баскетбол фестивалендә ҡатнаша. Турнирҙың алтын миҙалдары өсөн республика ҡалаларынан ун команда һәм Свердловск өлкәһенән бер команда көрәшә.
- Йәш спортсыларға үҙ-үҙен тормошҡа ашырыу һәм артабанғы үҫеш өсөн майҙансыҡ, яңы дуҫтар табыу һәм тәжрибә туплау өсөн урын бирә алыуыбыҙға шатбыҙ. Был фестиваль күнекмәләрҙе һынау ғына түгел, яңы ҡаҙаныштар өсөн дә сәбәп булһын, - тип билдәләне район хакимиәте башлығы Анна Карабанова сәләмләү һүҙендә. - Благовещен төбәктә баскетбол үҫешенең иң яҡшы үҙәктәренең береһе булып тора. Күптән түгел район командаһы тренеры Александр Осокинға Башҡортостан Республикаһы Хөкүмәтенең Рәхмәт хаты тапшырылды.
Муниципалитетыбыҙҙа ғына түгел, тотош Башҡортостанда ла спорт традициялары бай. Быны Башҡортостан Башлығы Радий Хәбиров та билдәләне. Уның һүҙҙәренсә, төбәктә спорт инфраструктураһы әүҙем нығытыла. Һуңғы йылдарҙа ғына Рима Баталова исемендәге спорт әҙерлеге үҙәге, Светлана Хоркина исемендәге гимнастика үҙәге, ябыҡ футбол манежы асыла. Өфө һәм бөтә Башҡортостан спорттың күп төрҙәре буйынса ҙур халыҡ-ара ярыштарҙы күп тапҡыр ҡабул итте. Рәсәй спорт министры Олег Матыцин билдәләүенсә, уларҙы ойошманың юғары кимәле айырып тора.
«Мин һәр ваҡыт спорт һәм уға бәйле Бөтә нәмә - Башҡортостандың дәүләт сәйәсәтенең мөһим йүнәлеше, тип әйтәм. Ҙур спорт сараларын йәлеп итеү - беҙҙең дәүләт бурысы. Беҙ ҡабул ғына итмәйбеҙ, ә йыш ҡына үҙебеҙ инициатива күрһәтәбеҙ. Һорау тыуа: ни өсөн? Ҙур спорт ярыштары һәр ваҡыт иҫ киткес һөҙөмтәгә эйә. Меңәрләгән бала, спортсыларҙы ҡарағандан һуң, спорт залдарына бара. Ә беҙ бындай кимәлдәге ярыштар үткәргәндә мөмкинлектәре сикләнгән кешеләр өсөн, ысынында улар мөмкинлектәре сикһеҙ кешеләр булһа ла, был спортҡа ҡыҙыҡһыныуҙы тағы ла нығыраҡ йәлеп итә. Тормош ауырлыҡтарына ҡарамаҫтан, һәр кем спорт менән шөғөлләнә ала. Шулай уҡ был спорт инфраструктураһын даими үҫтереүгә ҙур этәргес», - тип билдәләне Радий Хәбиров.
Анна Карабанова Благовещенда балалар һәм үҫмерҙәр баскетбол лигаһы урынлашасағын билдәләне. Был «Динамо»баскетбол клубын тулыландырыу өсөн резерв.