Еңеүсегә Артекҡа йүнәлтмә

 Башҡортостандың мәғарифты үҫтереү институтында «Тере классика» Бөтә Рәсәй йәш шиғыр уҡыусылар конкурсының төбәк туры үтте. 10-17 йәшлек 35 һәләтле бала – ижади ярыштың муниципаль этабы еңеүселәре үҙҙәренең актерлыҡ һәләтен тикшерҙе. Улар сәхнәнән яратҡан проза әҫәрҙәренән өҙөктәр уҡыны.

Еңеүселәр араһында Сыуаш-Ҡобау мәктәбенең 8-се класы уҡыусыһы Богдан Григорьев та бар. Сәхнәнән егет Михаил Зощенконың «Актер» әҫәренән өҙөк уҡыны. Мәктәп, муниципаль этаптар еңеүсеһе булған

Богдан уҡыуында тик яҡшы билдәләргә өлгәшә, күп уҡый, музыка менән мауыға.

– Матур әҙәбиәткә һөйөүҙе әсәйем һәм рус теле уҡытыусыһы Нина Исакова тәрбиәләне, – тип һөйләне Богдан. – Бындай конкурстарҙа бишенсе кластан башлап ҡатнашам, был һуңғыһы булмаҫ, тип ышанам.

         Талантлы егет мәктәптең театр түңәрәгенә йөрөй, сәхнәлә сығыш яһарға ярата.

– «Йәнле классика» конкурсында ҡатнашырға тәҡдим иткәс, Богдан шатланып ризалашты, – тип һөйләне Нина Викторовна. – Конкурсҡа оҙаҡ әҙерләндек. Кәрәкле өҙөктө һайлап алыу еңелдән булманы. Төбәк турына ебәрелгән видеороликтарҙы баһалау йомғаҡтары буйынса Богдан финалға сыҡты. Сәхнәгә сығыр алдынан бик борсолһа ла, ул үҙен ҡулға алып, жюри ағзаларын таң ҡалдырырлыҡ итеп сығыш яһаны. Сығышы ваҡытында тексты бик яҡшы белеүен дә, актерлыҡ оҫталығын да күрһәтте.

Еңеүселәрҙе (ә улар дүртәү) диплом, миҙал һәм «Артек» Халыҡ-ара балалар үҙәгенә путевка менән бүләкләнеләр. Башҡортостандың иң яҡшы шиғыр уҡыусылары, шул иҫәптән Богдан да, илдең иң күләмле әҙәби конкурсы финалында республика исеменән сығыш яһаясаҡ. Уға уңыштар теләйбеҙ.