2022 йылдың сентябрендә, өлөшләтә мобилизация үткәндә, “Сокол” саҡырыулы яҡташыбыҙ махсус хәрби операцияға китә. Күптән түгел ул ҡыҫҡа ваҡытлы отпускыла ял итеп, ә бөгөн инде хәрби хәрәкәттәр зонаһына юлланды.
Ваҡытлы хеҙмәтте кесе сержант Алыҫ Көнсығышта инженер-сапер батальонында өлкән уҡсы вазифаһында үткән. Мобилизацияға тиклем ул төҙөүсе булып эшләгән.
Сокол һөйләүенсә, офицерҙары бик яҡшы, һәм улар яуҙаштары менән татыу йәшәй. Уларҙың бурысы - территориаль оборона, тимәк, дошмандың, диверсия төркөмөнөң үтеп инеүен булдырмау төп маҡсат булып тора.
Көнкүрешебеҙҙе үҙ ҡулдарыбыҙ менән ойошторабыҙ, окоптар, блиндаждар ҡаҙып, үҙебеҙҙе утҡа тотоуҙан һаҡлайбыҙ. Янымда бер-береһен ауыр ваҡытта ташлап китмәгән, ә кәрәк саҡта ярҙам ҡулы һуҙырҙай батыр йөрәкле ир-егеттәр. Бындай шарттарҙа һәр ваҡыт бергә, бер - береңә таянып йәшәргә кәрәк», - ти ир.
Хәрби хеҙмәткәр үҙе һәм башҡа яугирҙар исеменән тылда ярҙам итеүселәргә рәхмәт белдерә. “Минең тыуған ҡалам - Благовещен ҡалаһы миңә һәм яҡташтарыма даими ярҙам итә. Гуманитар ярҙам бик кәрәкле ваҡытта беҙгә килеп етә. Балаларҙың хаттарын уҡығанда, яҡындарыбыҙҙың күңел йылыһын тоябыҙ”, - тип уртаҡлаша ир.
“Сокол”дың отпускыһы тамамланып, ул махсус хәрби операция зонаһына үҙенең хәрби иптәштәре эргәһенә китте. Әммә ул бында, ғәзиз тыуған төйәгендә, уны яҡындары: ата-әсәһе, ҡатыны һәм ике яратҡан ҡыҙҙары көтөүен яҡшы белә, уларҙың хәстәрлеген, һөйөүен тоя.Бына былар барыһы ла уға йәшәргә көс, эшләргә дәрт бирә.