Благовещен мәҙәниәт үҫеше үҙәгендә мәҙәниәт хеҙмәткәрҙәрен тәбрикләнеләр

Благовещен районында был өлкәлә эшләгән 42 учреждение: мәҙәниәт үҫеше үҙәге, ауыл мәҙәниәт йорттары, ҡала һәм ауыл китапханалары, балалар сәнғәт мәктәбе. Уларҙа һәләтле һәм ижади кешеләр эшләй, шулар араһынан бишәүһе Башҡортостан Республикаһының атҡаҙанған мәҙәниәт хеҙмәткәре исемен йөрөтә. Учреждение коллективтары 2023 йылда биш меңдән ашыу төрлө сара үткәрҙе.

“Беҙҙең районда уҙғарылған тантаналар муниципалитеттың визит карточкаһына әүерелде - ул Һабантуй, Масленица, Благовест. Былтыр “Завод йәйе” фестивале яңылыҡ булды. Ул ваҡиғалар туризмы өлкәһендә “Russian Event Awards – 2023” халыҡ-ара премияһында юғары баһаға лайыҡ булып, эшсе һөнәрҙәрен алға этәргән өсөн диплом алды. Ҡаланың тарих-тыуған яҡты өйрәнеү музейы беҙҙең районда туризмды үҫтереүҙең мөһим звеноларының береһе булып тора. Уның хеҙмәткәрҙәре бик күп экскурсиялар үткәрҙе, шул иҫәптән беҙҙең сәнәғәт предприятиеларына ла күпме халыҡты йәлеп итә, - тип билдәләне район хакимиәте башлығы Анна Карабанова. - Йәштәр менән эште лә үҫтерәбеҙ. Беҙҙең сәнғәт мәктәбендә бик һәләтле балалар уҡый. 2023 йылда уның тәрбиәләнеүселәренең 22-һе гран-при яуланы, 831-е лауреат исемен алды, 102 уҡыусы дипломант булды. Яҡшы яңылыҡ әйтергә теләйем: 2025 йылға яңы балалар сәнғәт мәктәбен төҙөү һәм булған биналарҙы ремонтлау буйынса пландар бар. Шулай уҡ алдағы өс йылда ауыл биләмәләрендә мәҙәниәтте үҫтереүҙе һәм модулле ауыл мәҙәниәт йорттарын төҙөүҙе планлаштырабыҙ”.

Мәҙәниәт хеҙмәткәрҙәре тормошобоҙға сәнғәт, ижад, гармония һәм матурлыҡ килтергән кешеләр. Уларҙың идеялары һәм тырыш хеҙмәте арҡаһында район халҡы ҡыҙыҡлы һәм сағыу тормош менән танышып бара. Үҙҙәренең һәләте менән улар донъяны күңеллерәк, изгелекле һәм матурыраҡ итә.

Анна Николаевна лайыҡлыларға лайыҡлы наградалар тапшырҙы. Ә балалар сәнғәт мәктәбе тәрбиәләнеүселәре тамашасыларға үҙҙәренең музыкаль номерҙарын ихлас бүләк итте.