Йәштәр сәләмәт йәшәү рәүешен яҡлай

Һарт-Лабау ауылы йәштәре сәләмәт йәшәү рәүеше яҡлы. Улар йыл әйләнәһенә төрлө спорт төрҙәре менән шөғөлләнә.

Һалҡындар башланыу менән малайҙар ауыл эргәһендәге быуа боҙын таҙартып, хоккей майҙансығы эшләй. Көн буйына бында күңелле бала-саға тауыштары тынмай – малайҙар хоккей уйнай. Хоккей командалары араһында ярыштарҙы элекке физкультура уҡытыусыһы, әлеге ваҡытта “Шәйхулла” мәсетенең имам-хатибы Илдар хәҙрәт Нуриев ойоштора. Ул ауыл халҡының рухи үҫешен дә ҡайғырта, ауылдаштарының, бигерәк тә йәш быуындың, физик һаулығын нығытыу өҫтөндә лә эшләй.

Илдар хәҙрәттең һүҙҙәренә ҡарағанда, хоккей уйнарға көн һайын егермегә яҡын төрлө йәштәге малайҙар йөрөй. Уларҙың хыялы – ауыл исеменән район турнирҙарында ла сығыш яһау.